Meinoad es is a gschpassig's Ding
Da um dees Zittergschpiel,
Werd' oaner oft so woach dabei,
Dees sag'n da' gar viel,
Und do' so schö' und lusti is's,
Du moanst es kunnt nit sey',
'S is, wie wann oane lacha thaat
Und woanet dengerscht d'rei'. –
I hon amal deßweg'n g'fragt
An' g'schickt'n Musikant,
Der sagt, die Zitter macht verliebt,
D'rum reißt's enk an' Verstand,
Da kimmt's die Junga trauri für,
Die no' nit All's derroacht,
Vor lauter Lieb' und Narretei
Werd' ihna 's Herz dawoacht,
Und bei an' Alt'n is's a so,
Kimmt er amal in Schwung,
So moant er, waar's no' nit vorbei
Und waar er wieder jung!