Herzliebster Schatz
O hör' um was i' bitt',
Wann d' an an' Buabn denka willst,
Gel' mi' vergiß fei' nit,
Denn thaatst mi' ganz vergeßn,
So kunnt' an' Unglück g'schegn,
Leicht brechet ma' mei' Herz vonand',
Ja ja du wur'st es segn.

Herzliebster Schatz
O hör' um was i' bitt',
Gel' daß d' mi do' a bißl magst,
Dessell verredst ma' nit,
Denn thaatst ma' dees verredn,
Gaang' all' mei' Hoffa z' Grund,
So wahr i' dei' mit Leib und Seel',
I' lebet mehr koa' Stund.

Herzliebster Schatz
O hör! um was i' bitt',
Wann d' just an' übrigs Bußl hast,
So mach mi' froh damit,
Na' machst koan schlechtn Handl,
I' steh' dir guat dafür,
Denn um a' Bußl schau vo' dir
A' Duze'd kriegst vo' mir.