Wenn Alles schö' staad is und still in der Nacht
Und i' aus'n Fenster die Stern' so betracht',
So denk' i' mir oft und sag' ma: ha mei',
Wie werd's wohl da droben in Himmi sey'!

Wohl sagn s', daß dortn a Herrlikeit
Wie's koani herunt auf der Erdn geit,
Und dengerscht, so kimmt's do' an jedn hart o',
Wann er halt amal nimmermehr dableibn ko'.

Ja ja, es is bsunders dees Leben dahier,
Daß oana gern da waar, was kann er dafür,
Und do' muß er furt, muß gar gschwindi' dahi',
Oft wunderts mi', daß i' so lusti' bi'!