Heunt bin i' fuchswild,
Und so wollt' i' do' glei',
Es schneibet vo' Sechser
An' schuhtiefn Neu.

Und heunt waar's mir oa' Ding
Und gaang Alles verdraaht,
Und wann Bier statt 'n Wasser
Im Bach rinna thaat.

Und i' hätt' nix dagegn
In mein'n Irger und Zorn,
Und waar i' statt an' G'hilfn
A' Forstmoasta 'worn.

Und vor lauter Verdruß
Thaat i' lacha dazua,
Wann i' koan' Kreuzer mehr hätt',
Aber Gul'n grad gnua.